Die Poschkoglmusi - des san fünf junge Leit,
de mit da Volksmusi hobn a Freid.
Mir hobn uns denkt, mir kunntn probiern,
dass ma gemeinsam amol musiziern.
Zum "Zsammangwöhnen" fang ma holt an,
dass ma im Fruahjoar 2001 flotte Stückln probn tan.

Hiatz denkts ihr sicha, es war net bled,
wann ma von de Leit wos wissen tät?

Von der Familienmusik Edegger hob ma glei zwoa,
die Eva und 'n Paul, do woars sofort kloar,
dass ma probn werdn ba senn,
brauchn nur mehr die aundarn noch Deutschlandsberg kemm.

Die Eva spült Hockbrett und aa Cajon seit neign,
so kemma bam Austro-Pop klass rhythmisch sein.
Sie mocht für Vulksmusiklehra den Konservatoriumslehrgaung,
damit sie als Kindagärtnarin aa Unterricht gebn kaunn.

Da Pauli hot Maschinenbau zan studiern aungfaung,
auf da TU Graz, und des dauat nou laung;
drum mocht er den Vulksmusilehra aa dazua,
wal Freizeit hot ma als Student jo eh gnua.
Er spült Posaun sowie Klarinettn,
Harmonika und aa die Trompetn.

Die Silvi auf da Gitarr hot aa a Familienmusik daham,
Hammer hoassns, und oans miassts ma glabn,
zu ihr noch Osterwitz foahrn, des is a Gfrett,
es geht so stal auffi, gor net zan glabn, dass nou a Häusl steht.

Sie is Mama und Ernährungslehre-Lehrarin,
kennt si bam Wein guat aus und is glernte Jagarin.

Die Harmonika spült da Thomas Böhm, sprich: "Böhmi" ba uns,
hot aa glernt, wie die aundarn, in da VMS Strunz.
Er hot aa aungfang zan studiern -
Maschinenbau - des is wos fiars Hiarn,
fiars Herz, die Musi, hot er aa Zeit, des war jo glocht,
drum aa er die Vulksmusilehra-Ausbüldung mocht.

Von der Familienmusik Strohmeier hobma mit guatn Gwissn,
in Daniel mit da Bossgeign "aussagrissn".
Von Zehndorf is er, des is ganz in der Näh
von Preding und vom Waldschachersee.
Er orbat schun seit einiger Zeit
Bei da Harmonikaerzeugung Strasser mit vulla Freid.

Hiatz, wia sullt ma uns nennan?
Gott sei Dank is uns da Einfoll kemman,
dass ma jo ba de Edeggers herobn -
also - am "Poschkogl" probn.

A poar von uns woars zerscht net recht,
aba mia hobns übazeugn maecht,
dass ma uns Poschkoglmusi nennan,
und uns die ganze Wölt sullt kennan.